Skipt um fólk

eftir Aðalheiði Birgisdóttur

Mér er alveg sama um þjóðlendumálið ...

Mér er alveg sama hvað verður um allt húsnæðið á Keflavíkurflugvelli ...

Mér er alveg sama hvort það verður reist álver í Helguvík ...

Mér er alveg sama hvað verður um rústirnar í miðbæ Reykjavíkur ...

Mér er alveg sama hvort það verður virkjað í Þjórsá – það má virkja Gullfoss mín vegna -... meðan tæplega 200 börn bíða eftir plássi á Barna- og unglingageðdeildinni.

Hvernig getur ein ríkasta þjóð í heimi komið svona fram við börnin sín?  Þetta er ekki bara forkastanlegt.  Þetta er ófyrirgefanlegt!

Ef við bætum svo við öllu gamla fólkinu og geðfötluðum sem bíða eftir mannsæmandi búsetuúrræðum þá er þetta orðinn dágóður hópur sem fær engin viðunandi úrræði mála sinna.

Á meðan hreykir forsætisráðherra sér að því að hér hafi kaupmáttur aukist um 75% á síðustu árum (sem er auðvitað bara bull og leikur að tölum og ekkert annað) og muldrar eitthvað um að nú sé verið að byggja við BUGL og nú eigi að fara að gera eitthvað í málefnum geðfatlaðra.  Núna?  Rétt áður en gengið er til kosninga?  Af hverju var ekki byggt við BUGL fyrir tveimur árum –nú eða bara 10?  Maðurinn er búinn að sitja 16 ár í ríkisstjórn og gjarnan mjög nálægt peningakassanum.  Hann skilur eftir sig sviðna jörð í málefnum þeirra sem minna mega sín.  En vafalítið hefur kaupmátturinn aukist vel hjá þeim sem skammta sér laun að vild. 

Ég er yfirmig þreytt á sinnulausum og skilningsvana stjórnvöldum.  Ég sætti mig ekki lengur við að börn fái ekki þá geðheilbrigðisþjónustu sem þau eiga skilið.  Ég sætti mig ekki við að geðfatlaðir þurfi að liggja úti í Öskjuhlíðinni af því það finnast ekki úrræði fyrir þá.  Ég sætti mig ekki við að mamma mín þurfi að deyja áður en hún fær húsnæði sem hentar henni.  Hún er margbúin að borga fyrir það húsnæði á langri ævi. 

Það þarf að skipta um stjórnendur í landinu.  Gefa þeim frí sem eru með allt niðrum sig í velferðamálunum.  Það þarf konu í stjórnarráðið við Lækjargötu.  Konu sem þorir, vill og getur og hefur sýnt hvers hún er megnug.   Við eigum stórkostlegt tækifæri til þess eftir nokkra daga.  Látum það ekki ganga okkur úr greipum.

Aðalheiður er almennt afskaplega þolinmóð og umburðarlynd kona.. en nú er þolinmæði hennar á þrotum. Það bara verður að skipta um ríkisstjórn, fyrir Aðalheiði og okkur hin.

Athugasemdir

[Þórdís Bára Hannesdóttir, 29.4.2007 kl. 23:55]

Gæi ekki verið meira sammála. Eins og talað úr mínu hjarta.

[Heimir Lárusson Fjeldsted, 30.4.2007 kl. 08:44]

Því er víðs fjarri að ég geti verið sammála.

[Matthildur Ágústa Helgadóttir Jónudóttir, 30.4.2007 kl. 09:14]

Mér er raunar ekki sama um þessi atriði sem þú telur upp en ósköp hlýtur  hagvöxtaraukningin að vera þessum börnum lítils virði.

[Anna Lára Steindal (IP-tala skráð) 30.4.2007 kl. 09:24]

Þessu er ég hjartanlega sammála. Auðvitað eru þau mál sem talin eru upp í upphafi pistils mikilvæg - en á MEÐAN fólkinu okkar er ekki sinnt eru þau ekki efst í huga mínum. Og Samfylkingin er sá flokkur sem ég treysti best til þess að fara í alvöru að huga að fólki umfram allt annað.

[Björgvin Valur (IP-tala skráð) 30.4.2007 kl. 10:46]

Alveg sammála Öllu.

[Lára Stefánsdóttir, 30.4.2007 kl. 10:53]

Þessi ríkisstjórn hefur átt nóg af peningum, þessir peningar hafa hinsvegar ekki verið fyrir fólkið í landinu. Það er því hræðilegt að þurfa að horfa upp á það að jafnvel blasir við að hún haldi áfram. Þessu verður að linna - fólk skiptir máli - öllu máli.

[Grímur Kjartansson, 30.4.2007 kl. 20:35]

Er það bara mér sem finnst það undarlegt að í febrúar 2007 hafi 18 börn verið á biðlista hjá BUGL en nú eru þau allt í einu orðin nær 200?

Ég hefði líka haft áhuga á hvað eru mörg börn í meðferð á Íslandi skipta þau þúsundum ef svo er þá má spurja hvað er eiginleg að hjá okkur íslendingum.